ఎస్సీ, ఎస్టీల సంక్షేమానికి తెలంగాణలో అధిక ప్రాధాన్యత: సీఎం రేవంత్

ప్రతిపక్షం, నవంబర్ 19: తెలంగాణలో షెడ్యూల్డు కులాలు, షెడ్యూల్డు తెగల సంక్షేమానికి తమ ప్రభుత్వం అత్యధిక ప్రాధాన్యత ఇస్తోందని ముఖ్యమంత్రి రేవంత్ రెడ్డి స్పష్టం చేశారు. విద్య, ఉపాధి, ఆర్థిక, రాజకీయ రంగాల్లో ఎస్సీ, ఎస్టీ వర్గాలకు సముచిత అవకాశాలు కల్పించేందుకు ప్రభుత్వం అనేక చర్యలు చేపడుతోందని వెల్లడించారు. హైదరాబాద్‌లోని ఎంసీఆర్ హెచ్ఆర్‌డీ కేంద్రంలో షెడ్యూల్డు కులాలు, షెడ్యూల్డు తెగల సంక్షేమంపై ఏర్పాటైన పార్లమెంటరీ కమిటీ సభ్యులతో ముఖ్యమంత్రి సమావేశమయ్యారు. ఈ భేటీలో ఎస్సీ, ఎస్టీ సంక్షేమ పార్లమెంటరీ కమిటీ చైర్మన్ డాక్టర్ ఫగ్గన్ సింగ్ కులస్తే, ఇతర కమిటీ సభ్యులు పాల్గొన్నారు. ఈ సందర్భంగా రాష్ట్రంలో ఎస్సీ, ఎస్టీల అభ్యున్నతి కోసం ప్రభుత్వం అమలు చేస్తున్న పథకాలు, తీసుకుంటున్న నిర్ణయాలను ముఖ్యమంత్రి వారికి వివరించారు.

రాజకీయ రంగంలోనూ ఎస్సీ, ఎస్టీ వర్గాలకు తగిన ప్రాధాన్యత కల్పిస్తున్నామని సీఎం తెలిపారు. శాసనసభ స్పీకర్ పదవితో పాటు మంత్రివర్గంలోనూ దళితులకు అవకాశం కల్పించిన విషయాన్ని ప్రస్తావించారు. పబ్లిక్ సర్వీస్ కమిషన్‌తో పాటు వివిధ ప్రభుత్వ కార్పొరేషన్లలోనూ వారికి అవకాశాలు కల్పిస్తున్నామని వివరించారు. కేవలం సంక్షేమ పథకాలకే పరిమితం కాకుండా నిర్ణయాలు తీసుకునే కీలక స్థానాల్లోనూ ఎస్సీ, ఎస్టీ వర్గాలకు ప్రాతినిధ్యం కల్పించడమే తమ ప్రభుత్వ విధానమని పేర్కొన్నారు.

ఉన్నత విద్యా రంగంలో తీసుకున్న నిర్ణయాలను కూడా ముఖ్యమంత్రి ఈ సమావేశంలో ప్రత్యేకంగా ప్రస్తావించారు. వందేళ్లకు పైగా చరిత్ర కలిగిన ఉస్మానియా విశ్వవిద్యాలయానికి తొలిసారిగా దళిత వర్గానికి చెందిన వ్యక్తిని వైస్ ఛాన్సలర్‌గా నియమించే అవకాశం కల్పించామని తెలిపారు. ఉస్మానియా యూనివర్సిటీతో పాటు డాక్టర్ బీఆర్ అంబేద్కర్ ఓపెన్ యూనివర్సిటీ, రాజీవ్ గాంధీ ఐఐఐటీల్లోనూ ఎస్సీ, ఎస్టీ వర్గాలకు చెందిన వారికి వైస్ ఛాన్సలర్లుగా అవకాశం కల్పించినట్లు వివరించారు. అర్హత, సామర్థ్యం ఉన్న ప్రతి రంగంలోనూ ఆయా వర్గాలకు తగిన ప్రాతినిధ్యం కల్పించేందుకు ప్రభుత్వం కృషి చేస్తోందని చెప్పారు.

ఇళ్ల కేటాయింపులోనూ ఎస్సీ, ఎస్టీ కుటుంబాలకు ప్రభుత్వం ప్రాధాన్యత ఇస్తోందని రేవంత్ రెడ్డి వెల్లడించారు. ఇందిరమ్మ ఇళ్ల పథకం కింద లబ్ధిదారుల ఎంపికలో ఆయా వర్గాలకు ప్రాధాన్యత కల్పిస్తున్నట్లు తెలిపారు. అదేవిధంగా ముఖ్యమంత్రి సహాయనిధి (సీఎంఆర్ఎఫ్), ఆరోగ్యశ్రీ పథకాల ద్వారా అందిస్తున్న ఆర్థిక సహాయంలో 50 శాతానికి పైగా నిధులను ఎస్సీ, ఎస్టీ వర్గాల సంక్షేమం కోసం ఖర్చు చేస్తున్నట్లు సమావేశంలో వివరించారు. పేద కుటుంబాలకు వైద్యపరమైన ఆర్థిక భారం తగ్గించడంతో పాటు గృహ వసతి, విద్య, ఉపాధి అవకాశాలు మెరుగుపరిచేందుకు ప్రభుత్వం చర్యలు తీసుకుంటోందని పేర్కొన్నారు.

మరోవైపు దేశంలోనే తొలిసారిగా ఎస్సీ వర్గీకరణను అమలు చేసిన రాష్ట్రంగా తెలంగాణ నిలిచిందని ముఖ్యమంత్రి గుర్తుచేశారు. ఈ నిర్ణయం ద్వారా ఎస్సీ వర్గాల్లోని వివిధ ఉపకులాలకు సామాజిక న్యాయం అందించేందుకు ప్రభుత్వం చర్యలు చేపట్టిందని వివరించారు. అలాగే విద్యార్థులకు నాణ్యమైన విద్య అందించాలనే లక్ష్యంతో యంగ్ ఇండియా ఇంటిగ్రేటెడ్ రెసిడెన్షియల్ స్కూళ్ల ఏర్పాటును కూడా ప్రస్తావించారు. తెలంగాణ ప్రభుత్వం చేపడుతున్న ఎస్సీ వర్గీకరణ అమలు, యంగ్ ఇండియా సమీకృత గురుకుల పాఠశాలల ఏర్పాటు వంటి కార్యక్రమాలను పార్లమెంటరీ కమిటీ సభ్యులు అభినందించారు.

ఈ సమావేశంలో కమిటీ సభ్యులు డాక్టర్ మల్లు రవి, తాపీర్ గావ్, హరీశ్ చంద్ర మీనా, అనిల్ ఫిరోజియా, అరుణ్ కుమార్, దగ్గుమల్ల ప్రసాద రావుతో పాటు ఎంపీ చామల కిరణ్ కుమార్ రెడ్డి, పలువురు శాసనసభ్యులు, రాష్ట్ర ప్రభుత్వ ఉన్నతాధికారులు పాల్గొన్నారు. ఎస్సీ, ఎస్టీ వర్గాల సామాజిక, ఆర్థిక అభివృద్ధికి ప్రభుత్వం తీసుకుంటున్న చర్యలు, భవిష్యత్తులో అమలు చేయనున్న కార్యక్రమాలపై ఈ సమావేశంలో చర్చించారు.

Related News

Latest News