ప్రతిపక్షం, ఆగస్టు 14: తెలంగాణ రాష్ట్ర సాధన కోసం ప్రాణాలను సైతం లెక్కచేయకుండా పోరాడిన ఉద్యమకారులు, తమ పాటలతో ప్రజల్లో చైతన్యం నింపిన కళాకారులు ఆశించిన లక్ష్యాలు పూర్తిగా నెరవేరలేదనే ఆవేదన వ్యక్తమవుతోంది. ప్రత్యేక రాష్ట్రం ఏర్పడి ఏళ్లు గడుస్తున్నా అట్టడుగు వర్గాల ప్రజల జీవితాల్లో ఆశించిన మార్పు రాకపోవడం, ‘సామాజిక తెలంగాణ’ లక్ష్యం ఇంకా సాకారం కాకపోవడం బాధాకరమని కల్వకుంట్ల కవిత పేర్కొన్నారు.
తెలంగాణ సాధన అనేది కేవలం భౌగోళికంగా ఒక రాష్ట్రాన్ని ఏర్పాటు చేయడం మాత్రమే కాదని, ప్రజల ఆత్మగౌరవంతో ముడిపడిన అంశమని ఆమె అభిప్రాయపడ్డారు. ఉద్యమ సమయంలో ముందుండి పోరాడిన కళాకారులు, ఉద్యమకారులకు తగిన గుర్తింపు, న్యాయం దక్కలేదనే విమర్శలు ఇప్పటికీ వినిపిస్తున్నాయని తెలిపారు.
తెలంగాణ కోసం ప్రాణత్యాగం చేసిన అమరవీరుల కుటుంబాలకు కూడా ఆశించిన స్థాయిలో ఆదరణ, న్యాయం అందలేదని కవిత ఆవేదన వ్యక్తం చేశారు. వారి కుటుంబాల సమస్యలను పరిష్కరించాల్సిన బాధ్యత ప్రభుత్వాలపై ఉందన్నారు.
రాష్ట్రంలోని సహజ వనరులు, కాంట్రాక్టులు ఇంకా బయటి వ్యక్తులు, శక్తుల చేతుల్లోనే ఉన్నాయనే విమర్శలు కూడా కొనసాగుతున్నాయని ఆమె పేర్కొన్నారు. గతంలో తాను లేవనెత్తిన అనేక అంశాలపై ఇప్పుడు ఇతర నాయకులు కూడా మాట్లాడుతున్నారని తెలిపారు.
ముఖ్యంగా అధికార పార్టీకి చెందిన ఎమ్మెల్యే కోమటిరెడ్డి రాజగోపాల్రెడ్డి సైతం తెలంగాణ వనరులు, ప్రజల సమస్యలకు సంబంధించిన అంశాలను ప్రస్తావించడం రాజకీయంగా చర్చనీయాంశంగా మారిందన్నారు. తాను గతంలో వ్యక్తం చేసిన ఆందోళనల్లోని అంశాలు ఇప్పుడు ఇతర నాయకుల మాటల్లోనూ ప్రతిధ్వనిస్తున్నాయని పేర్కొన్నారు.
‘కన్న పేగును కాదని తెలంగాణ ప్రజల కోసం పోరాడుతున్నా’ అంటూ తాను గతంలో వ్యక్తం చేసిన ఆవేదన వెనుక ఉన్న ఉద్దేశాన్ని ప్రజలు, నాయకులు ఇప్పుడు క్రమంగా అర్థం చేసుకుంటున్నారని కవిత వ్యాఖ్యానించారు. అధికారంలో ఉన్నవారే పాలన, పరిస్థితులపై అసంతృప్తి వ్యక్తం చేస్తున్న నేపథ్యంలో తెలంగాణ సమాజం మరోసారి ఆలోచించాల్సిన అవసరం ఏర్పడిందన్నారు.
ప్రతి కుటుంబం జీవితంలో మార్పు తీసుకురావాలంటే భౌగోళిక తెలంగాణతో పాటు ‘సామాజిక తెలంగాణ’ కూడా సాకారం కావాలని కవిత స్పష్టం చేశారు. తెలంగాణ సమాజం మరింత చైతన్యవంతం అవుతోందని, సామాజిక న్యాయం కోసం మరింత మంది నాయకులు తనతో కలిసి ముందుకు వచ్చే అవకాశం ఉందని ఆమె పేర్కొన్నారు. సామాజిక తెలంగాణ దిశగా బలమైన అడుగులు వేయాల్సిన సమయం ఆసన్నమైందని తెలిపారు.
