ప్రతిపక్షం, అక్టోబర్ 08: ఒక చిన్నారి రాసిన సమాధానం ఉపాధ్యాయులనే కాదు.. చదివిన ప్రతి ఒక్కరి మనసును కదిలిస్తోంది. దేవుడు ప్రత్యక్షమైతే పిల్లలు సాధారణంగా ఆట వస్తువులు, కొత్త బట్టలు, ఇష్టమైన వస్తువులు కోరుకుంటారు. కానీ హైదరాబాద్ శివారు షాబాద్‌లో ఐదో తరగతి చదువుతున్న ఓ బాలిక మాత్రం తనకు ఎంతో ఇష్టమైన నాన్నను తిరిగి ఇవ్వాలని కోరుకుంది. ఆమె రాసిన సమాధానం ప్రస్తుతం అందరి హృదయాలను కలచివేస్తోంది.
షాబాద్‌లోని మండల పరిషత్ ప్రాథమిక పాఠశాలలో ఇటీవల సమ్మేటివ్ తెలుగు పరీక్ష నిర్వహించారు. ఇందులో భాగంగా ‘మీకు లక్ష్మీనరసింహస్వామి ప్రత్యక్షమైతే ఏమి కోరుకుంటారు?’ అనే ప్రశ్నను విద్యార్థులకు ఇచ్చారు. ఈ ప్రశ్నకు ఒక్కో విద్యార్థి తమకు నచ్చిన కోరికను సమాధానంగా రాశారు. అయితే ఓ ఐదో తరగతి విద్యార్థిని రాసిన సమాధానం మాత్రం ఉపాధ్యాయుల దృష్టిని ఆకర్షించింది.
‘నాకు మా నాన్న కావాలి’ అంటూ ఆ చిన్నారి తన సమాధానాన్ని రాసింది. రెండేళ్ల క్రితమే తన తండ్రిని కోల్పోయిన ఆ బాలిక.. ఇప్పటికీ ఆయన జ్ఞాపకాల నుంచి బయటపడలేకపోయినట్లు ఈ ఒక్క వాక్యంతో అర్థమవుతోంది. దేవుడు ప్రత్యక్షమైతే తనకు ఏం కావాలని అడిగినా.. తన తండ్రినే తిరిగి ఇవ్వాలని కోరుకోవడం ఆమె తండ్రిపై ఉన్న ప్రేమను, ఆయన లేని లోటును తెలియజేస్తోంది.
చిన్నారి రాసిన సమాధానాన్ని చూసిన ఉపాధ్యాయులు భావోద్వేగానికి గురయ్యారు. ఆమె పరిస్థితిని అర్థం చేసుకుని బాలికను ఓదార్చారు. తండ్రిని కోల్పోయిన బాధను మరిచిపోయేలా ఆమెకు ధైర్యం చెప్పారు. పరీక్షలో ఒక ప్రశ్నకు రాసిన చిన్న సమాధానం అయినప్పటికీ.. ఆ మాటల వెనుక దాగి ఉన్న చిన్నారి మనసులోని బాధను చూసి ఉపాధ్యాయులు చలించిపోయారు.
పిల్లల మనసులో తల్లిదండ్రుల స్థానం ఎంత ప్రత్యేకమో ఈ సంఘటన మరోసారి గుర్తుచేస్తోంది. ఎన్నో కోరికలు, ఆశలు ఉన్న వయసులోనూ ఆ బాలికకు తన తండ్రి జ్ఞాపకమే అత్యంత ముఖ్యమైన కోరికగా మారింది. ఆమె రాసిన ‘మా నాన్న కావాలి’ అనే మాట ఇప్పుడు ఆ పాఠశాలలోనే కాకుండా ఈ ఘటన గురించి తెలిసిన వారందరి మనసులను తాకుతోంది.
