Two die in road accident while returning from wedding in Jagitial: జగిత్యాల జిల్లాలో ఘోర రోడ్డు ప్రమాదం చోటుచేసుకుంది. ఆదివారం తెల్లవారుజామున జరిగిన ఈ రోడ్డు ప్రమాదంలో ఇద్దరు అక్కడికక్కడే మృతి చెందారు. కరీంనగర్- జగిత్యాల రహదారి ధరూర్ వద్ద జగిత్యాల డిపోనకు చెందిన సూపర్ లగ్జరీ బస్సు కారును ఢీకొట్టింది. ఈ ప్రమాదంలో కారు నడుపుతున్న సంకీర్త్‌తోపాటు ఓ యువతి మృతి చెందారు. వెనుక సీటులో కూర్చున్న రాయమల్లు, ఆయన భార్యకు తీవ్ర గాయాలయ్యాయి. సమాచారం అందుకున్న పోలీసులు ఘటనాస్థలానికి చేరుకొని సహాయక చర్యలు చేపట్టారు. క్షతగాత్రులను స్థానిక ఆస్పత్రికి తరలించి చికిత్స అందిస్తున్నారు. మృతదేహాలను పోస్టుమార్టం నిమిత్తం మార్చురీకి తరలించారు. పెళ్లికి హాజరై తిరిగి వస్తుండగా ఈ ప్రమాదం జరిగినట్లు తెలుస్తోంది. ప్రమాద సమయంలో జగిత్యాల డిపోనకు చెందిన ఆర్టీసీ బస్సు టైరు ఊడింది. అయితే బస్సు టైరు ఊడి కారును ఢీకొట్టిందా లేదా కారు ఢికొట్టిన తర్వాత టైరు ఊడిందా అనే విషయం తెలియాల్సి ఉంది. ఈ మేరకు పోలీసులు కేసు నమోదు చేసుకొని దర్యాప్తు చేస్తున్నారు.
