ప్రతిపక్షం, ఆగస్టు 21: భార్యాభర్తలు లేదా ప్రేమజంటల మధ్య చిన్నచిన్న అభిరుచుల తేడాలు కొన్నిసార్లు ఆసక్తికరమైన పరిస్థితులకు దారితీస్తుంటాయి. అలాంటి వాటిలో ప్రస్తుతం ‘ఫుడ్ డివోర్స్’ అనే ట్రెండ్ కూడా చర్చలోకి వస్తోంది. పేరులో విడాకులు ఉన్నప్పటికీ.. దీనికి నిజమైన విడాకులతో ఎలాంటి సంబంధం లేదు. ఆహారపు అలవాట్లు వేర్వేరుగా ఉండే జంటలు పాటించే విధానాన్నే సరదాగా ‘ఫుడ్ డివోర్స్’ అని పిలుస్తున్నారు.
ఒకరు ఆరోగ్యంపై ప్రత్యేక శ్రద్ధ పెట్టి కఠినమైన ఆహార నియమాలు పాటిస్తుంటే.. మరో వ్యక్తి మాత్రం పిజ్జా, బర్గర్, ఫ్రైడ్ ఫుడ్, స్వీట్లు వంటి ఇష్టమైన ఆహారాన్ని తినడానికి ఆసక్తి చూపుతుంటారు. దీంతో ఇద్దరూ కలిసి భోజనం చేయడం కష్టంగా మారుతుంది. అయితే దీనివల్ల వారి బంధంలో ఎలాంటి విభేదాలు రావాల్సిన అవసరం లేదని నిపుణులు చెబుతున్నారు.
ఇలాంటి జంటలు తమ ఆహారపు అలవాట్లకు అనుగుణంగా వేర్వేరుగా వంట చేసుకోవడం లేదా తమకు నచ్చిన ఆహారాన్ని విడివిడిగా ఆర్డర్ చేసుకుని తినడం చేస్తుంటారు. ఒకరి ఆహార నియమాలను మరొకరు గౌరవిస్తూ తమకు నచ్చిన విధంగా తినడమే ఈ విధానంలోని ప్రధాన ఉద్దేశం.
ఆరోగ్యకరమైన జీవనశైలిని పాటించాలనుకునే వారితో పాటు తమకు ఇష్టమైన ఆహారాన్ని వదులుకోలేని జంటల్లో ఈ విధానం ఎక్కువగా కనిపిస్తోందని విశ్లేషకులు చెబుతున్నారు. ఆహారపు అలవాట్లు భిన్నంగా ఉన్నంత మాత్రాన సంబంధంలో సమస్యలు రావాల్సిన అవసరం లేదని, ఒకరి అభిరుచులను మరొకరు గౌరవించుకోవడం ముఖ్యమని సూచిస్తున్నారు.
అందుకే ‘ఫుడ్ డివోర్స్’ అంటే నిజంగా విడిపోవడం కాదు.. కలిసే ఉంటూ, భోజనం మాత్రం ఎవరి ఇష్టానుసారం వారు చేసుకోవడమే!
