ప్రతిపక్షం, ఆగస్టు 26: అమెరికాలో మంచి ఉద్యోగం, భారీ జీతం.. చాలామంది యువత కలలు కనే జీవితం. కానీ రైతుల కోసం ఏదైనా చేయాలన్న లక్ష్యంతో శశికుమార్ ఆ కలల జీవితాన్ని వదులుకున్నారు. వ్యవసాయ రంగంలోకి అడుగుపెట్టి ఎన్నో సవాళ్లు ఎదుర్కొన్న ఆయన నేడు వేలాది మంది రైతులకు మార్కెట్ కల్పిస్తూ ఏడాదికి సుమారు రూ.600 కోట్ల వ్యాపారం చేసే స్థాయికి ఎదిగారు.
విదేశాల్లో ఉద్యోగం చేస్తున్న సమయంలోనే రైతుల పరిస్థితులు, ముఖ్యంగా పాడి రైతులు ఎదుర్కొంటున్న సమస్యలు శశికుమార్ను ఆలోచింపజేశాయి. రైతులు నాణ్యమైన ఉత్పత్తులు తయారు చేస్తున్నప్పటికీ వాటికి సరైన మార్కెట్, ధర లభించక ఇబ్బందులు పడుతున్నారని గుర్తించారు. దీంతో ఉద్యోగాన్ని వదిలి దేశానికి తిరిగి వచ్చి రైతులతో కలిసి పనిచేయాలని నిర్ణయించుకున్నారు.
ఈ ఆలోచనతో ‘అక్షయకల్ప’ సంస్థను ప్రారంభించారు. అయితే సంస్థను స్థాపించిన వెంటనే విజయాలు అందలేదు. ఆర్థిక ఇబ్బందులు, వ్యాపారంలో ఎదురైన వరుస వైఫల్యాలతో పలుమార్లు దివాలా తీసే పరిస్థితులు ఎదురయ్యాయి. ఏకంగా ఆరుసార్లు తీవ్రమైన ఆర్థిక సంక్షోభాలను ఎదుర్కొన్నప్పటికీ శశికుమార్ తన లక్ష్యాన్ని మాత్రం వదులుకోలేదు.
వ్యాపారాన్ని కొనసాగించేందుకు కుటుంబం నుంచి కూడా సవాళ్లు ఎదురయ్యాయి. తన నిర్ణయంపై తండ్రి తీవ్ర అసంతృప్తి వ్యక్తం చేసి కొంతకాలం తనతో మాట్లాడకపోయినా శశికుమార్ వెనక్కి తగ్గలేదు. చివరకు భార్య అందించిన ఆర్థిక సహాయంతో సంస్థను నిలబెట్టుకుని ముందుకు సాగారు.
రైతుల నుంచి నేరుగా నాణ్యమైన సేంద్రియ ఉత్పత్తులను కొనుగోలు చేసి వినియోగదారులకు అందించే విధానాన్ని సంస్థ అభివృద్ధి చేసింది. ప్రస్తుతం సుమారు 2,800 మంది రైతులతో కలిసి పనిచేస్తున్నట్లు సమాచారం. రైతుల ఉత్పత్తులకు మార్కెట్ కల్పించడంతో పాటు వారికి మెరుగైన ఆదాయం అందేలా సంస్థ కృషి చేస్తోంది.
రైతులకు నెలకు సగటున రూ.1.28 లక్షల వరకు ఆదాయం వచ్చేలా అవకాశాలు కల్పిస్తున్నట్లు సంస్థ పేర్కొంటోంది. రైతుల జీవన ప్రమాణాలను మెరుగుపరచడమే లక్ష్యంగా ప్రారంభమైన ఈ ప్రయత్నం ఇప్పుడు భారీ స్థాయి వ్యాపారంగా ఎదిగింది.
ఒకప్పుడు అమెరికా ఉద్యోగాన్ని వదిలి వ్యవసాయ రంగంలోకి రావడంపై విమర్శలు ఎదుర్కొన్న శశికుమార్.. నేడు తన నిర్ణయం తప్పుకాదని నిరూపించారు. ఆర్థిక నష్టాలు, కుటుంబ ఒత్తిళ్లు, వరుస వైఫల్యాలను అధిగమించి లక్ష్యంపై పట్టుదలతో ముందుకు సాగితే విజయం సాధించవచ్చని ఆయన ప్రయాణం చెబుతోంది.
