ప్రతిపక్షం, అక్టోబర్ 14: ప్రధానమంత్రి నరేంద్ర మోదీ 2047 నాటికి వికసిత భారత్‌ను నిర్మించాలనే లక్ష్యంతో ముందుకు సాగుతున్నారని, ఈ లక్ష్యాన్ని సాధించడంలో రాష్ట్రాల సహకారం ఎంతో అవసరమని తెలంగాణ ముఖ్యమంత్రి రేవంత్‌రెడ్డి అన్నారు. ఎన్నికల సమయంలోనే రాజకీయాలు చేయాలని, అభివృద్ధి విషయంలో మాత్రం అందరూ కలిసి పనిచేయాల్సిన అవసరం ఉందని స్పష్టం చేశారు. కేంద్రం, రాష్ట్రాలు పరస్పర సహకారంతో ముందుకు సాగినప్పుడే దేశం అన్ని రంగాల్లో అభివృద్ధి చెందుతుందని పేర్కొన్నారు. 2047 నాటికి భారతదేశానికి స్వాతంత్య్రం వచ్చి వందేళ్లు పూర్తవుతాయని గుర్తుచేశారు. ఈ నేపథ్యంలో దేశ ఆర్థిక వ్యవస్థను మరింత బలోపేతం చేయడం, యువతకు కొత్త అవకాశాలు కల్పించడం, పారిశ్రామిక రంగాన్ని విస్తరించడం వంటి అంశాలపై ప్రత్యేక దృష్టి సారించాల్సిన అవసరం ఉందని అభిప్రాయపడ్డారు. బుధవారం హైదరాబాద్‌లోని హైటెక్స్‌లో నిర్వహించిన సమాఖ్య వ్యాపార సదస్సు-2026ను ప్రారంభించిన సందర్భంగా ముఖ్యమంత్రి ఈ వ్యాఖ్యలు చేశారు.
సమాఖ్య వ్యవస్థకు భారతదేశంలో ఎంతో ప్రాధాన్యం ఉందని రేవంత్‌రెడ్డి పేర్కొన్నారు. ప్రాచీన కాలంలో వస్తు మార్పిడి విధానం ద్వారా వ్యాపారాలు జరిగేవని, కాలానుగుణంగా వ్యాపార రంగంలో అనేక మార్పులు చోటుచేసుకున్నాయని వివరించారు. ప్రస్తుత ఆధునిక యుగంలో సాంకేతిక పరిజ్ఞానం, కొత్త ఆవిష్కరణలు, వ్యాపార విధానాలపై అవగాహన పెంచుకోవడానికి సమాఖ్యలు కీలక పాత్ర పోషిస్తాయని అన్నారు. వివిధ రంగాల్లో విజయాలు సాధించిన వ్యక్తుల అనుభవాలను ఒకచోట చేర్చి, వాటిని భావితరాలకు అందించడం ద్వారా యువతకు ఎంతో మేలు జరుగుతుందని తెలిపారు. కొత్త తరం పారిశ్రామికవేత్తలను ప్రోత్సహించేందుకు ఇలాంటి కార్యక్రమాలు నిర్వహించడం అభినందనీయమని పేర్కొన్నారు.
మున్నూరు కాపు సామాజిక వర్గానికి చెందిన పలువురు వ్యక్తులు సినిమా, రాజకీయాలు, వ్యాపారం సహా వివిధ రంగాల్లో ఉన్నత స్థానాలకు చేరుకున్నారని ముఖ్యమంత్రి కొనియాడారు. వ్యక్తిగతంగా విజయాలు సాధించడంతోపాటు ఇతరులకు ఆదర్శంగా నిలవడం కూడా ముఖ్యమని అన్నారు. వివిధ రంగాల్లో విజయం సాధించిన వారి అనుభవాలు, ఎదుర్కొన్న సవాళ్లు, అనుసరించిన విధానాలను సమాఖ్య భద్రపరిచి కొత్త తరానికి అందించాలని సూచించారు. యువత తమ లక్ష్యాలను నిర్దేశించుకుని ముందుకు సాగేందుకు విజయగాథలు మార్గదర్శకంగా నిలుస్తాయని చెప్పారు. తెలంగాణ రాష్ట్ర అభివృద్ధికి సంబంధించి భవిష్యత్ లక్ష్యాలను నిర్దేశించుకునే క్రమంలోనే 2025లో తెలంగాణ రైజింగ్-2047 దార్శనిక పత్రాన్ని విడుదల చేసినట్లు గుర్తుచేశారు.
తెలంగాణను దేశంలోనే అత్యంత బలమైన ఆర్థిక వ్యవస్థల్లో ఒకటిగా తీర్చిదిద్దాలన్నది తమ ప్రభుత్వ లక్ష్యమని రేవంత్‌రెడ్డి తెలిపారు. 2034 నాటికి రాష్ట్ర ఆర్థిక వ్యవస్థను ఒక లక్ష కోట్ల డాలర్ల స్థాయికి, 2047 నాటికి మూడు లక్షల కోట్ల డాలర్ల స్థాయికి తీసుకెళ్లాలని లక్ష్యంగా పెట్టుకున్నట్లు వెల్లడించారు. ఈ లక్ష్యాలను చేరుకోవడానికి రాష్ట్రంలోని వివిధ ప్రాంతాల అవసరాలు, అవకాశాలను దృష్టిలో ఉంచుకుని ప్రత్యేక అభివృద్ధి ప్రణాళికను రూపొందిస్తున్నామని చెప్పారు. తెలంగాణను ప్రధానంగా మూడు ఆర్థిక ప్రాంతాలుగా విభజించి అభివృద్ధి చేయాలని నిర్ణయించినట్లు వివరించారు. నగర ప్రాంతాలు, నగర శివారు ప్రాంతాలు, గ్రామీణ ప్రాంతాలకు వాటి స్వభావానికి అనుగుణంగా ప్రాధాన్యం కల్పిస్తూ ముందుకు సాగనున్నట్లు తెలిపారు.
హైదరాబాద్‌ ఔటర్‌ రింగ్‌ రోడ్డు పరిధిలోని ప్రాంతాన్ని కోర్‌ అర్బన్‌ రీజియన్‌ ఎకానమీగా అభివృద్ధి చేయాలని లక్ష్యంగా పెట్టుకున్నామని ముఖ్యమంత్రి వివరించారు. ఈ ప్రాంతంలో సమాచార సాంకేతిక రంగం, సేవల రంగం, అత్యాధునిక సాంకేతిక పరిజ్ఞానం, ఆవిష్కరణలు, ఆధునిక వ్యాపార కార్యకలాపాలకు ప్రాధాన్యం ఇస్తామని తెలిపారు. ఇప్పటికే హైదరాబాద్‌ అంతర్జాతీయ స్థాయిలో సాంకేతిక రంగానికి ప్రధాన కేంద్రంగా గుర్తింపు పొందిందని, ఈ అవకాశాలను మరింత విస్తరించేందుకు చర్యలు తీసుకుంటామని పేర్కొన్నారు. ప్రపంచ స్థాయి సంస్థలను ఆకర్షించడంతోపాటు స్థానిక యువతకు నాణ్యమైన ఉద్యోగ అవకాశాలు కల్పించడం, కొత్త వ్యాపార సంస్థల ఏర్పాటుకు అనుకూల వాతావరణాన్ని సృష్టించడం తమ ప్రణాళికలో భాగమని వివరించారు.
ఔటర్‌ రింగ్‌ రోడ్డు నుంచి ప్రాంతీయ వలయ రహదారి వరకు ఉన్న ప్రాంతాన్ని పెరి అర్బన్‌ రీజియన్‌ ఎకానమీగా అభివృద్ధి చేయనున్నట్లు రేవంత్‌రెడ్డి తెలిపారు. ఈ ప్రాంతంలో తయారీ పరిశ్రమలు, పారిశ్రామిక పార్కులు, సరకు రవాణా, నిల్వ సదుపాయాలు, అనుబంధ వ్యాపార కార్యకలాపాలను ప్రోత్సహిస్తామని చెప్పారు. పరిశ్రమలకు అవసరమైన మౌలిక సదుపాయాలను కల్పించడం ద్వారా పెట్టుబడులను ఆకర్షించవచ్చని పేర్కొన్నారు. పరిశ్రమల స్థాపనతో స్థానికంగా ఉపాధి అవకాశాలు పెరగడంతోపాటు రాష్ట్ర ఆదాయం కూడా వృద్ధి చెందుతుందని వివరించారు. మరోవైపు, మిగిలిన గ్రామీణ ప్రాంతాలను గ్రామీణ వ్యవసాయ ఆర్థిక ప్రాంతాలుగా అభివృద్ధి చేయాలని లక్ష్యంగా పెట్టుకున్నామని తెలిపారు. వ్యవసాయం, ఆహార శుద్ధి పరిశ్రమలు, వ్యవసాయ ఆధారిత వ్యాపారాలు, గ్రామీణ ఉపాధికి ఈ ప్రాంతాల్లో పెద్దపీట వేస్తామని వెల్లడించారు.
తెలంగాణను ప్రపంచ పెట్టుబడులకు ఆకర్షణీయమైన గమ్యస్థానంగా తీర్చిదిద్దడమే తమ ప్రభుత్వ సంకల్పమని ముఖ్యమంత్రి స్పష్టం చేశారు. దేశ స్థూల దేశీయోత్పత్తిలో తెలంగాణ ప్రస్తుతం సుమారు ఐదు శాతం వాటాను కలిగి ఉందని, ఈ వాటాను పది శాతానికి పెంచాలనే లక్ష్యంతో పనిచేస్తున్నామని తెలిపారు. ఇందుకోసం పారిశ్రామికాభివృద్ధిని వేగవంతం చేయడంతోపాటు కొత్త పెట్టుబడులను ఆకర్షించాల్సిన అవసరం ఉందని పేర్కొన్నారు. రాష్ట్రంలో పెట్టుబడులు పెట్టేందుకు ముందుకు వచ్చే పారిశ్రామికవేత్తలకు అనుకూల విధానాలు, అవసరమైన సహకారం అందించేందుకు ప్రభుత్వం సిద్ధంగా ఉందని చెప్పారు. తెలంగాణలో ఉన్న మౌలిక సదుపాయాలు, నైపుణ్యం కలిగిన మానవ వనరులు, వ్యాపార అవకాశాలను ప్రపంచానికి పరిచయం చేయడం ద్వారా మరిన్ని పెట్టుబడులను తీసుకురావచ్చని అభిప్రాయపడ్డారు.
హైదరాబాద్‌ నగరానికి వాణిజ్య కేంద్రంగా సుదీర్ఘ చరిత్ర ఉందని రేవంత్‌రెడ్డి పేర్కొన్నారు. నాలుగు వందల ఏళ్ల క్రితమే దేశంలోని వివిధ ప్రాంతాలతోపాటు విదేశాల నుంచి వచ్చిన వ్యాపారులకు చార్మినార్‌ ఒక ముఖ్యమైన కేంద్రంగా నిలిచిందని గుర్తుచేశారు. కాలక్రమేణా నగరం అభివృద్ధి చెందుతూ ప్రస్తుతం హైటెక్‌ సిటీ అంతర్జాతీయ వ్యాపార కార్యకలాపాలకు గుర్తింపు పొందిన ప్రాంతంగా ఎదిగిందని తెలిపారు. ఇదే స్ఫూర్తితో తెలంగాణను భవిష్యత్తులో మరింత విస్తృతమైన పెట్టుబడుల కేంద్రంగా తీర్చిదిద్దాలని ప్రభుత్వం భావిస్తోందని చెప్పారు. కొత్త పారిశ్రామిక విధానంలో స్థానిక పారిశ్రామికవేత్తలు కూడా భాగస్వాములు కావాలని పిలుపునిచ్చారు. ఇప్పటివరకు చాలామంది స్థానిక నిపుణులు పెద్ద సంస్థలకు సేవలు అందించే దిశగా పనిచేశారని, ఇకపై వారే సొంతంగా సంస్థలను స్థాపించి అంతర్జాతీయ స్థాయికి ఎదగాలని ఆకాంక్షించారు.
ఆర్థికాభివృద్ధిలో మహిళల భాగస్వామ్యం అత్యంత కీలకమని ముఖ్యమంత్రి రేవంత్‌రెడ్డి అన్నారు. మహిళలకు వ్యాపార అవకాశాలు కల్పించి, ఆర్థికంగా బలోపేతం చేసిన దేశాలు మరింత అభివృద్ధి సాధిస్తున్నాయని పేర్కొన్నారు. తెలంగాణలో మహిళా పారిశ్రామికవేత్తలను ప్రోత్సహించాల్సిన అవసరం ఉందని, ఈ దిశగా ప్రభుత్వం పలు కార్యక్రమాలను అమలు చేస్తోందని తెలిపారు. మహిళా సంఘాలకు బ్యాంకుల అనుసంధానం ద్వారా సుమారు రూ.61 వేల కోట్ల రుణాలు అందించినట్లు వెల్లడించారు. మహిళలు కేవలం రుణాలు తీసుకునే వారిగానే కాకుండా, సొంత వ్యాపారాలు నిర్వహించే యజమానులుగా ఎదగాలన్నది ప్రభుత్వ ఉద్దేశమని వివరించారు. ఆర్టీసీ బస్సులు, పెట్రోల్‌ బంకులు, సౌర విద్యుత్‌ కేంద్రాల నిర్వహణ వంటి రంగాల్లోనూ మహిళలకు అవకాశాలు కల్పిస్తున్నట్లు చెప్పారు.
ఈ సందర్భంగా సమాఖ్య వాణిజ్య మండలికి ముఖ్యమంత్రి ప్రత్యేక సూచనలు చేశారు. యువతతోపాటు మహిళా పారిశ్రామికవేత్తలను ప్రోత్సహించే కార్యక్రమాలను మరింత విస్తృతంగా చేపట్టాలని కోరారు. కొత్తగా వ్యాపారాలు ప్రారంభించాలనుకునే వారికి మార్గదర్శకత్వం, పెట్టుబడులపై అవగాహన, వ్యాపార నిర్వహణలో శిక్షణ వంటి అంశాల్లో సహకారం అందించాలని సూచించారు. మహిళలు, యువత ఆర్థికంగా ఎదిగేందుకు అవసరమైన విధానపరమైన మద్దతును ప్రభుత్వం అందిస్తుందని భరోసా ఇచ్చారు. పెట్టుబడిదారులు తెలంగాణలో వ్యాపారాలు ప్రారంభించేందుకు ముందుకు రావాలని, వారి పెట్టుబడులకు ప్రభుత్వం అండగా ఉంటుందని స్పష్టం చేశారు. రాష్ట్ర అభివృద్ధి లక్ష్యాలను సాధించేందుకు ప్రభుత్వం, పారిశ్రామికవేత్తలు, వ్యాపార సంస్థలు సమన్వయంతో పనిచేయాలని పిలుపునిచ్చారు.
హైదరాబాద్‌లో రెండు రోజులపాటు నిర్వహించనున్న సమాఖ్య వ్యాపార సదస్సులో వివిధ రంగాలకు చెందిన ప్రతినిధులు, పారిశ్రామికవేత్తలు, ప్రజాప్రతినిధులు పాల్గొంటున్నారు. ఈ కార్యక్రమానికి ఆంధ్రప్రదేశ్‌ శాసనసభ ఉపసభాపతి కె. రఘురామకృష్ణరాజు, పార్లమెంటు సభ్యుడు కె. లక్ష్మణ్‌, వేం నరేందర్‌రెడ్డి, ప్రభుత్వ సలహాదారు వి. హనుమంతరావు, ప్రభుత్వ విప్‌ ఆది శ్రీనివాస్‌, శాసనసభ్యులు గంటా శ్రీనివాసరావు, దానం నాగేందర్‌, మున్నూరు కాపు ఫౌండేషన్‌ చైర్మన్‌ బొమ్మ శ్రీరాం చక్రవర్తి, న్యాయమూర్తి భవానీ ప్రసాద్‌, కరీంనగర్‌ గ్రంథాలయ సంస్థ చైర్మన్‌ సత్తు మల్లేశ్‌ తదితరులు హాజరయ్యారు. వ్యాపార రంగంలో కొత్త అవకాశాలను గుర్తించడం, యువతను పారిశ్రామికవేత్తలుగా తీర్చిదిద్దడం, మహిళల భాగస్వామ్యాన్ని పెంచడం, తెలంగాణను ప్రపంచ పెట్టుబడులకు కేంద్రంగా అభివృద్ధి చేయడం వంటి అంశాలపై ఈ సదస్సు చర్చలకు వేదికగా నిలవనుంది.
