ప్రతిపక్షం, సెప్టెంబర్ 04: తెలంగాణ రాజకీయాల్లో తాజాగా మాజీ మంత్రి కొండా సురేఖ చేసిన వ్యాఖ్యలు ఆసక్తికరంగా మారాయి. బీఆర్ఎస్ అధినేత, మాజీ ముఖ్యమంత్రి కేసీఆర్పై ఆమె ప్రశంసలు కురిపించారు. కేసీఆర్ చాలా మంచివారని, తమ పట్ల ఆయన ఎప్పుడూ గౌరవంతో వ్యవహరించేవారని సురేఖ పేర్కొన్నారు. ఓ ఇంటర్వ్యూలో మాట్లాడిన ఆమె.. కేసీఆర్ వ్యక్తిత్వం, తమతో ఆయన వ్యవహరించిన తీరును గుర్తుచేసుకున్నారు.
కేసీఆర్ తమను ఎప్పుడూ ఒక్క మాట కూడా అనలేదని కొండా సురేఖ తెలిపారు. తాము ఎప్పుడు ఆయనను కలిసేందుకు వెళ్లినా మంచిగా స్వాగతించేవారని చెప్పారు. కేసీఆర్లో హుందాతనం ఉందని, తమకు ఎప్పుడూ గౌరవం ఇచ్చేవారని ఆమె పేర్కొన్నారు. రాజకీయంగా విభేదాలు ఉన్నప్పటికీ వ్యక్తిగతంగా తమ పట్ల కేసీఆర్ వ్యవహరించిన తీరు తనకు గుర్తుందని సురేఖ వ్యాఖ్యానించారు.
అంతేకాకుండా తన భర్త కొండా మురళికి ఎమ్మెల్సీ పదవి దక్కిన విషయాన్ని కూడా సురేఖ ప్రస్తావించారు. తాము కోరిన వెంటనే కేసీఆర్ తన భర్త కొండా మురళికి ఎమ్మెల్సీ పదవి ఇచ్చారని ఆమె చెప్పారు. ఈ విషయంలో కేసీఆర్ తమకు సహకరించిన తీరును ఆమె గుర్తుచేసుకున్నారు.
కాగా, కొండా సురేఖ రాజకీయ ప్రస్థానంలో బీఆర్ఎస్ కూడా కీలకంగా ఉంది. 2013లో ఆమె అప్పటి టీఆర్ఎస్లో చేరారు. అనంతరం రాజకీయ పరిణామాల నేపథ్యంలో 2018లో కాంగ్రెస్ పార్టీలో చేరారు. ప్రస్తుతం కాంగ్రెస్ రాజకీయాల్లో కొనసాగినప్పటికీ, బీఆర్ఎస్ అధినేత కేసీఆర్పై ఆమె చేసిన తాజా వ్యాఖ్యలు రాజకీయ వర్గాల్లో చర్చనీయాంశంగా మారాయి.
కేసీఆర్ వ్యక్తిత్వం, తమ పట్ల ఆయన చూపిన గౌరవం గురించి సురేఖ చేసిన వ్యాఖ్యలు ప్రస్తుతం రాజకీయంగా ఆసక్తిని రేకెత్తిస్తున్నాయి. గతంలో రాజకీయంగా కలిసి పనిచేసిన సందర్భాలను గుర్తుచేసుకుంటూ ఆమె చేసిన ఈ వ్యాఖ్యలు ప్రాధాన్యత సంతరించుకున్నాయి.
