- రేషన్ కార్డుల్లో పేర్లు చేర్చడం కూడా చేతకాలేదు
- కాంగ్రెస్ హయాంలో సంక్షేమ పథకాలకు పెద్దపీట
- ఎమ్మెల్యే డాక్టర్ కవ్వంపల్లి సత్యనారాయణ
ప్రతిపక్షం, మానకొండూర్, సెప్టెంబర్ 5: పదేళ్లపాటు అధికారంలో ఉన్న బీఆర్ఎస్ ప్రభుత్వం అర్హులైన పేదలకు కొత్త రేషన్ కార్డులు ఇవ్వడంతోపాటు కనీసం ఉన్న కార్డుల్లో కుటుంబ సభ్యుల పేర్లను నమోదు చేయడం, తప్పులను సరిదిద్దడం కూడా చేయలేకపోయిందని మానకొండూర్ ఎమ్మెల్యే, టీపీసీసీ ఎస్సీ సెల్ చైర్మన్ డాక్టర్ కవ్వంపల్లి సత్యనారాయణ విమర్శించారు. అలాంటి గత పాలకులు ప్రస్తుతం ప్రజలకు సంక్షేమ పథకాలను అందిస్తున్న కాంగ్రెస్ ప్రభుత్వాన్ని విమర్శించడం విడ్డూరంగా ఉందన్నారు.శనివారం మానకొండూర్ మండల కేంద్రంలోని కేఎస్ కన్వెన్షన్లో నిర్వహించిన కార్యక్రమంలో ఎమ్మెల్యే పాల్గొన్నారు. ఈ సందర్భంగా మండలంలోని 100 మంది లబ్ధిదారులకు ఇందిరమ్మ ఇళ్ల మంజూరు పత్రాలు, 53 మంది లబ్ధిదారులకు కళ్యాణలక్ష్మి, షాదీ ముబారక్ చెక్కులను అందజేశారు.
ప్రజల అవసరాలను గుర్తిస్తున్నాం
ఈ సందర్భంగా కవ్వంపల్లి మాట్లాడుతూ.. కాంగ్రెస్ ప్రభుత్వం అధికారంలోకి వచ్చిన తర్వాత ప్రజల అవసరాలకు అనుగుణంగా సంక్షేమ పథకాలను అమలు చేస్తోందన్నారు. కుటుంబంలో కొత్తగా సభ్యులు చేరినప్పటికీ వారి పేర్లు రేషన్ కార్డుల్లో నమోదు కాక అనేక కుటుంబాలు ఇబ్బందులు పడ్డాయని చెప్పారు. కార్డుల్లో తప్పులు ఉన్నా సరిదిద్దుకునే అవకాశం లేక ప్రజలు ప్రభుత్వ కార్యాలయాల చుట్టూ తిరిగారని పేర్కొన్నారు.ప్రస్తుతం కాంగ్రెస్ ప్రభుత్వం రేషన్ కార్డుల జారీతోపాటు కుటుంబ సభ్యుల పేర్ల నమోదు, తప్పుల సవరణకు చర్యలు చేపట్టిందన్నారు. అర్హత ఉన్న ప్రతి కుటుంబానికి ప్రభుత్వ సంక్షేమ పథకాలు అందించడమే లక్ష్యంగా ప్రభుత్వం పనిచేస్తోందని తెలిపారు.
పేదల సొంతింటి కల నెరవేరుస్తున్నాం
ఇందిరమ్మ ఇళ్ల పథకం ద్వారా ఇల్లు లేని నిరుపేద కుటుంబాలకు సొంతింటి కలను సాకారం చేస్తున్నామని ఎమ్మెల్యే తెలిపారు. అర్హత ఉన్న ప్రతి కుటుంబానికి ఇల్లు అందేలా ప్రభుత్వం చర్యలు తీసుకుంటోందన్నారు.అదేవిధంగా ఆడపిల్లల వివాహాలకు కుటుంబాలపై ఆర్థిక భారం పడకుండా కళ్యాణలక్ష్మి, షాదీ ముబారక్ పథకాల ద్వారా ఆర్థిక సహాయం అందిస్తున్నామని చెప్పారు. సంక్షేమ పథకాలు కేవలం ప్రకటనలకే పరిమితం కాకుండా లబ్ధిదారులకు చేరేలా ప్రభుత్వం చర్యలు తీసుకుంటోందన్నారు.
గత పాలకులు ఇప్పుడు నీతులు చెబుతున్నారు
బీఆర్ఎస్ పదేళ్ల పాలనలో రాష్ట్ర ఆర్థిక పరిస్థితి దెబ్బతిన్నదని కవ్వంపల్లి ఆరోపించారు. రాష్ట్ర ఖజానాను ఖాళీ చేసి ఆర్థిక భారాన్ని పెంచిన గత పాలకులు ఇప్పుడు కాంగ్రెస్ ప్రభుత్వాన్ని విమర్శించడం హాస్యాస్పదంగా ఉందన్నారు.
పాలనలో ప్రజల సమస్యలను పట్టించుకోని వారు ఇప్పుడు రోడ్లపైకి వచ్చి నిరసనలు చేపడుతున్నారని విమర్శించారు. ప్రజలు గత పాలనను, ప్రస్తుత పాలనను బేరీజు వేసుకోవాలని సూచించారు.
రసమయి ఇకనైనా అసత్య ప్రచారాలు మానుకోవాలి
మానకొండూర్ నియోజకవర్గ అభివృద్ధిని గత పాలకులు విస్మరించారని ఎమ్మెల్యే ఆరోపించారు. మాజీ ఎమ్మెల్యే రసమయి బాలకిషన్ తనపై, కాంగ్రెస్ ప్రభుత్వంపై చేస్తున్న ఆరోపణలు నిరాధారమైనవని అన్నారు.అవినీతి, అక్రమాలు, భూకబ్జాలకు పాల్పడి ఆస్తులు కూడబెట్టుకున్నారంటూ రసమయిపై ఎమ్మెల్యే తీవ్ర ఆరోపణలు చేశారు. ప్రజలకు వాస్తవాలు తెలియకుండా అసత్య ప్రచారాలు చేయడం మానుకోవాలని హితవు పలికారు.ఎంతగా ఆరోపణలు చేసినా అబద్ధాలను నిజాలుగా మార్చడం సాధ్యం కాదని, ప్రజలు వాస్తవాలను గమనిస్తున్నారని కవ్వంపల్లి అన్నారు.
లబ్ధిదారులు పనులు వేగంగా పూర్తి చేసుకోవాలి
రాష్ట్ర ఆర్థిక పరిస్థితి ఇబ్బందికరంగా ఉన్నప్పటికీ సంక్షేమ పథకాల అమలుకు ప్రభుత్వం ప్రాధాన్యం ఇస్తోందని ఎమ్మెల్యే తెలిపారు. ఇందిరమ్మ ఇళ్ల మంజూరు పొందిన లబ్ధిదారులు ఎలాంటి ఆందోళన చెందాల్సిన అవసరం లేదన్నారు.మంజూరు పత్రాలు అందుకున్న వెంటనే ఇళ్ల నిర్మాణ పనులను ప్రారంభించి నిర్ణీత గడువులోగా పూర్తి చేసుకోవాలని సూచించారు. నిర్మాణ పనులకు సంబంధించిన బిల్లుల చెల్లింపుల్లో ఇబ్బందులు లేకుండా చర్యలు తీసుకుంటామని హామీ ఇచ్చారు.
కార్యక్రమంలో ఎంపీడీవో వీవీ వరలక్ష్మి, తహసీల్దార్ రాజేంద్రప్రసాద్, హౌసింగ్ పీడీ, ప్యాక్స్ చైర్మన్లు నాగిశెట్టి రాజయ్య, ముద్దసాని శ్రీనివాస్రెడ్డి, గంగుల రాంరెడ్డి, రొంటాల లక్ష్మారెడ్డి, మండల కాంగ్రెస్ అధ్యక్షుడు ద్యావ శ్రీనివాస్రెడ్డి, జిల్లా కాంగ్రెస్ ఉపాధ్యక్షుడు నందగిరి రవీంద్రచారి, మండల సర్పంచుల ఫోరం చైర్మన్ పెంచాల కిషన్రావుతోపాటు కాంగ్రెస్ నాయకులు, కార్యకర్తలు, లబ్ధిదారులు తదితరులు పాల్గొన్నారు.
