*చెడుపై మంచి విజయానికి నిదర్శనంగా రావణ వధ వేడుక – ఆకట్టుకున్న భారీ రావణాసురుడి దిష్టిబొమ్మ.
*దసరా వేడుకల్లో సందడిగా పాల్గొన్న మున్సిపల్ చైర్మన్ కోడి శ్రీనివాసులు.
ప్రతిపక్షం చండూరు అక్టోబర్ 20: చండూరు పట్టణంలో విజయదశమి పర్వదినాన్ని పురస్కరించుకుని నిర్వహించిన రావణ దహన వేడుకలు అత్యంత ఘనంగా, కన్నుల పండుగగా జరిగాయి. పట్టణ శివారు ప్రాంతంలో ఏర్పాటు చేసిన భారీ రావణాసురుడి దిష్టిబొమ్మ దహన కార్యక్రమానికి స్థానిక ప్రజలు పెద్ద ఎత్తున తరలివచ్చారు.
*చెడుపై మంచి విజయానికి ప్రతీక:
చెడుపై మంచి సాధించిన విజయానికి ప్రతీకగా ప్రతి ఏటా దసరా రోజున రావణాసురుడి దిష్టిబొమ్మను దహనం చేయడం ఆనవాయితీగా వస్తోందని చైర్మన్ కోడి శ్రీనివాసులు తెలిపారు. శ్రీరాముడు రావణాసురుడిపై విజయం సాధించిన రోజునే విజయదశమిగా జరుపుకుంటారని, ఇది ధర్మం ఎప్పటికీ గెలుస్తుందనే సందేశాన్ని ఇస్తుందని అన్నారు.
అదే సంప్రదాయాన్ని ఈ ఏడాది కూడా చండూరులో ఘనంగా నిర్వహించడం సంతోషంగా ఉందని, ఈ వేడుకల ద్వారా పట్టణంలోని ప్రజలందరూ ఒక్కచోట చేరి ఐక్యతను చాటడం అభినందనీయమని పేర్కొన్నారు.
అనంతరం భారీ రావణాసురుడి దిష్టిబొమ్మకు నిప్పు పెట్టి దహనం చేయడంతో అక్కడికి వచ్చిన ప్రజలు పెద్ద ఎత్తున హర్షధ్వానాలు చేశారు. చిన్నారులు, యువత ఈ దృశ్యాన్ని చూసి ఆనందం వ్యక్తం చేశారు.
ఈ సందర్భంగా చైర్మన్ కోడి శ్రీనివాసులు మాట్లాడుతూ చండూరు మున్సిపల్ పట్టణ ప్రజలందరికీ విజయదశమి శుభాకాంక్షలు తెలిపారు. చండూరు పట్టణ ప్రజలందరూ సుఖసంతోషాలతో, ఆయురారోగ్యాలతో ఉండాలని, ప్రతి కుటుంబంలో సుఖశాంతులు, శాంతి సౌభాగ్యాలు వెల్లివిరియాలని ఆ విజయదుర్గ అమ్మవారిని ప్రార్థించినట్లు తెలిపారు.పట్టణ అభివృద్ధిలో ప్రజల సహకారం ఎంతో అవసరమని, అందరూ కలిసికట్టుగా ఉంటే చండూరును మరింత అభివృద్ధి చేసుకోవచ్చని ఆయన పిలుపునిచ్చారు.
ఈ కార్యక్రమంలో ముఖ్య అతిథులుగా చండూరు మున్సిపల్ చైర్మన్కోడి శ్రీనివాసులు, వైస్ చైర్మన్ భూతరాజు దశరథ పాల్గొన్నారు. వారితో పాటు మున్సిపల్ కౌన్సిలర్లు, కో ఆప్షన్ మెంబర్లు, మాజీ ప్రజాప్రతినిధులు, వివిధ పార్టీల నాయకులు, యువజన సంఘాల ప్రతినిధులు, చండూరు మున్సిపల్ ప్రజలు తదితరులు పాల్గొని వేడుకను విజయవంతం చేశారు.
