ఉపాధ్యాయుల సేవలు వెలకట్టలేనివి
కుకునూరుపల్లిలో ఘనంగా ఉపాధ్యాయుల సన్మాన కార్యక్రమం
ప్రతిపక్షం, నంగునూరు/కుకునూరుపల్లి, అక్టోబరు 24: విద్యార్థుల జీవితాలకు దిశానిర్దేశం చేస్తూ, సమాజ ప్రగతికి బాటలు వేసేది గురువేనని కొండపాక మార్కెట్ కమిటీ చైర్మన్ విరుపాక శ్రీనివాస్ రెడ్డి, పీఎన్‌ఆర్ స్వచ్ఛంద సంస్థ చైర్మన్ పోల్కంపల్లి నరేందర్, కుకునూరుపల్లి మండల విద్యాధికారి బచ్చలి సత్తయ్య, సర్పంచ్ మల్లం కనకవ్వ ఐలయ్య అన్నారు. ఉపాధ్యాయులు అందించే విద్య, విలువలు విద్యార్థుల భవిష్యత్తును తీర్చి దిద్దుతాయని పేర్కొన్నారు. కుకునూరు పల్లి మండల వనరుల కేంద్రంలో శనివారం సాయంత్రం మండలంలోని ప్రాథమిక, ఉన్నత పాఠశాలల ఉపాధ్యాయులకు సన్మాన కార్యక్రమం నిర్వహించారు. ఈ కార్యక్రమానికి వారు ముఖ్య అతిథులుగా హాజరయ్యారు.
విద్యార్థులకు గురువులే మార్గదర్శులు
ఈ సందర్భంగా ముఖ్య అతిథులు మాట్లాడుతూ ఉపాధ్యాయ వృత్తి ఎంతో బాధ్యతతో కూడుకున్నదని అన్నారు. గురువు లేని విద్య గమ్యం లేని ప్రయాణం వంటిదని పేర్కొన్నారు. ఉపాధ్యాయులు కేవలం పాఠాలు బోధించే వారే కాదని చెప్పారు. విద్యార్థుల్లో క్రమశిక్షణ, నైతిక విలువలు, ఆత్మవిశ్వాసం, దేశభక్తిని పెంపొందించే మార్గదర్శులని కొనియాడారు.విద్యార్థులకు పుస్తక జ్ఞానాన్ని అందించడంతో పాటు జీవితంలో ఎదురయ్యే సవాళ్లను ధైర్యంగా ఎదుర్కొనేలా తీర్చిదిద్దాలని సూచించారు. సమాజానికి ఉపయోగపడే మంచి పౌరులుగా విద్యార్థులను రూపొందించడం ఉపాధ్యాయుల ప్రధాన కర్తవ్యమని తెలిపారు. ప్రతి విద్యార్థిలోని ప్రతిభను గుర్తించి, వారిని ప్రోత్సహించాలని కోరారు.
గురువులను గౌరవించడం విద్యార్థుల బాధ్యత
విద్యార్థులు తమ గురువుల పట్ల గౌరవభావం కలిగి ఉండాలని వక్తలు సూచించారు. ఉపాధ్యాయులు చెప్పే మంచి మాటలను ఆచరణలో పెట్టాలన్నారు. తల్లిదండ్రుల ఆశయాలను గౌరవిస్తూ, క్రమశిక్షణతో చదువుకోవాలని తెలిపారు. విద్యతో పాటు మంచి నడవడికను అలవర్చుకోవాలని చెప్పారు. సమాజ సేవకు ప్రాధాన్యం ఇచ్చే వ్యక్తులుగా ఎదగాలని ఆకాంక్షించారు.
ఉపాధ్యాయులకు ఘన సన్మానం
ఈ కార్యక్రమంలో పీఏసీఎస్ చైర్మన్ పిస్క అమరేందర్, ముద్దాపూర్ సర్పంచ్ శ్రీకాంత్, అజీముద్దీన్, నరేశ్, ఉప్పల రాజు, చిన్నకిష్టాపూర్ కాంప్లెక్స్ ప్రధానోపాధ్యాయుడు చెన్న శ్రీనివాస్, ఉన్నత పాఠశాలల ప్రధానోపాధ్యాయులు రమేశ్, జానకి రాంరెడ్డి, రాజిరెడ్డి, కొండి మల్లారెడ్డి, శ్రీనివాస్ రెడ్డి తదితరులు మాట్లాడారు. అనంతరం మండలంలోని ప్రాథమిక, ఉన్నత పాఠశాలల్లో పనిచేస్తున్న ఉపాధ్యాయులందరినీ శాలువాలతో సత్కరించారు. వారి సేవలను కొనియాడి అభినందించారు.
