బీసీ-ఏ కులాల హక్కులు, రిజర్వేషన్లను కాపాడాలి
సిద్ధిపేటలో వివిధ బీసీ సంఘాల నేతల నిరసన
ప్రతిపక్షం ప్రతినిధి,సిద్ధిపేట, అక్టోబర్ 24: బీసీ-డీ జాబితాలో ఉన్న ముదిరాజ్ కులాన్ని బీసీ-ఏ గ్రూపులో చేర్చవద్దని సిద్ధిపేటలోని వివిధ బీసీ సంఘాల నాయకులు డిమాండ్ చేశారు. ఇప్పటికే సామాజికంగా, ఆర్థికంగా, విద్యాపరంగా వెనుకబడిన బీసీ-ఏ కులాల రిజర్వేషన్లకు రక్షణ కల్పించాలని కోరారు. ఓటు బ్యాంకు రాజకీయాలకు తావివ్వకుండా, వెనుకబడిన వర్గాల వాస్తవ పరిస్థితులను పరిగణనలోకి తీసుకుని నిర్ణయాలు తీసుకోవాలని విజ్ఞప్తి చేశారు. శనివారం సిద్దిపేటలోని డాక్టర్ బి.ఆర్. అంబేడ్కర్ చౌక్ వద్ద నాయిబ్రాహ్మణ సంఘం జిల్లా మాజీ అధ్యక్షుడు కోత్వాల్ యాదనరేందర్ నాయి ఆధ్వర్యంలో ఈ అంశంపై కార్యక్రమం నిర్వహించారు.
బీసీ-ఏ కులాలకు న్యాయం చేయాలి
ఈ సందర్భంగా నాయకులు మాట్లాడుతూ బీసీ కులాల వెనుకబాటుతనాన్ని గుర్తించేందుకు పేదరికం, విద్యా ప్రమాణాలు, నివాస పరిస్థితులు, వృత్తి, సామాజిక స్థితిగతులు, ప్రభుత్వ ఉద్యోగాల్లో ప్రాతినిధ్యం వంటి అంశాలను పరిగణనలోకి తీసుకోవాలని పేర్కొన్నారు. వెనుకబడిన తరగతుల మధ్య ఉన్న అసమానతలను గుర్తించి, ప్రతి కులానికి న్యాయం జరిగేలా రిజర్వేషన్ విధానాన్ని అమలు చేయాలని కోరారు.బీసీ-ఏ గ్రూపులోని అనేక కులాలు ఇప్పటికీ పేదరికం, నిరక్షరాస్యత, ఉపాధి అవకాశాల కొరత వంటి సమస్యలను ఎదుర్కొంటున్నాయని తెలిపారు. విద్య, ఉద్యోగాలు, ఆర్థికాభివృద్ధి, రాజకీయ ప్రాతినిధ్యంలో తమకు తగిన అవకాశాలు లభించడం లేదని ఆవేదన వ్యక్తం చేశారు. ఇలాంటి పరిస్థితుల్లో ఇతర కులాలను బీసీ-ఏలో చేర్చడం వల్ల ఇప్పటికే వెనుకబడిన వర్గాలకు అందుతున్న అవకాశాలపై ప్రభావం పడుతుందని అభిప్రాయపడ్డారు.
కమిషన్ సిఫారసులను అమలు చేయాలి
1968లో ప్రభుత్వం ఏర్పాటు చేసిన అనంతరామన్ కమిషన్ సిఫారసులు, వెనుకబడిన తరగతుల వర్గీకరణకు సంబంధించిన విధానాలను పరిశీలించి అమలు చేయాలని నాయకులు కోరారు. సామాజిక, ఆర్థిక, విద్యాపరమైన వెనుకబాటుతనాన్ని శాస్త్రీయంగా అంచనా వేసి నిర్ణయాలు తీసుకోవాలని సూచించారు. కమిషన్ సిఫారసులకు విరుద్ధంగా వ్యవహరించవద్దని విజ్ఞప్తి చేశారు. బీసీ కులాల మధ్య ఉన్న అసమానతలను తొలగించేందుకు సమగ్ర అధ్యయనం అవసరమని పేర్కొన్నారు. బోగస్ కుల ధ్రువపత్రాలను గుర్తించి, వాటి జారీకి బాధ్యులైన వారిపై చట్టపరమైన చర్యలు తీసుకోవాలని డిమాండ్ చేశారు. రిజర్వేషన్ల ప్రయోజనాలు అర్హులైన వెనుకబడిన వర్గాలకు అందేలా ప్రభుత్వం పర్యవేక్షించాలని కోరారు.
విద్య, ఉద్యోగాల్లో అవకాశాలు కల్పించాలి
బీసీ-ఏ కులాలకు విద్య, ఉద్యోగాలు, ఆర్థిక, సామాజిక రంగాల్లో తగిన అవకాశాలు కల్పించాలని నాయకులు కోరారు. కులవివక్ష, కులదూషణలు, సామాజిక బహిష్కరణ వంటి ఘటనలను అరికట్టేందుకు సమర్థవంతమైన చర్యలు తీసుకోవాలని సూచించారు. బాధితులకు న్యాయం జరిగేలా చట్టాలను పటిష్ఠంగా అమలు చేయాలని, అవసరమైన రక్షణ చర్యలు చేపట్టాలని విజ్ఞప్తి చేశారు.తెలంగాణలో బీసీ-ఏ గ్రూపునకు కేటాయించిన రిజర్వేషన్లను రాజ్యాంగ బద్ధంగా అమలు చేయాలని కోరారు. బీసీ-ఏ వర్గాల జీవన పరిస్థితులు, విద్యా స్థాయి, ఉపాధి, రాజకీయ ప్రాతినిధ్యంపై సమగ్ర అధ్యయనం నిర్వహించాలని సూచించారు. ఈ అంశాలన్నింటినీ పరిగణనలోకి తీసుకుని నిర్ణయం తీసుకోవాలని ముఖ్యమంత్రి రేవంత్‌రెడ్డి, సంబంధిత కమిషన్లు, అధికారులు, ప్రజాప్రతినిధులకు విజ్ఞప్తి చేశారు. ఈ కార్యక్రమంలో బోయ వాల్మీకి సంఘం జిల్లా అధ్యక్షుడు బోయ రాములు, మేదర సంఘం జిల్లా అధ్యక్షుడు శ్రీనివాస్, గోత్రాల సంఘం నాయకుడు సంతోష్, గంగిరెద్దుల సంఘం నాయకుడు జిడ్డి కనకయ్య, జమ్మె సారయ్య, గంగపుత్ర సంఘం ప్రతినిధులు బిజ్జి రాజయ్య, తొంట యాదగిరి, ప్రభురాజు, రజక సంఘం ప్రధాన కార్యదర్శి సీహెచ్ గణేశ్, గౌరవ అధ్యక్షుడు అంతగిరి కనకయ్య, కోశాధికారి నారాయణరావుపేట శ్రీనివాస్, రంజిత్, శివకుమార్ తదితరులు పాల్గొన్నారు. బీసీ-ఏ కులాల హక్కులను పరిరక్షిస్తూ, వెనుకబడిన వర్గాలకు న్యాయం జరిగేలా ప్రభుత్వం చర్యలు తీసుకోవాలని వారు కోరారు.
